Noticias
Rodaxe de Trote

Xacio Baño: "toda a vida imos lembrar a fin de semana que pasamos aquí rodando na Amil"

Parte do equipo do filme Trote mantivo un encontro coas e cos aloitadores e coa veciñanza da parroquia para amosarlles a importancia que o patrimonio natural e etnográfico acada neste proxecto


06 decembro 2017

"Toda a vida imos lembrar a fin de semana que pasamos aquí con vós rodando na Amil" aseguroulle Xacio Baño ás e aos aloitadores desta parroquia morañesa. O director do filme Trote, o produtor executivo Sergio Frade, e a actriz Tamara Canosa mantiveron esta tarde un encontro coas e cos aloitadores da Rapa das Bestas da Amil e coa veciñanza para amosarlles a importancia que a tradición e o patrimonio etnográfico acadan neste traballo cinematográfico. "Estamos moi contentos coa familia que se creou entre o equipo da peli e as e os aloitadores" engadiu Xacio Baño. Hai que lembrar que parte desta película, que conta co patrocinio da Área de Cultura e Lingua da Deputación de Pontevedra, fora rodada o pasado mes de xullo durante a Rapa das Bestas.

No encontro, que tivo lugar na Casa Cultural da parroquia, tamén participaron o deputado provincial de Cultura e Lingua, Xosé Leal, e a deputada e tamén concelleira de Moraña, Eva Vilaverde. Precisamente Eva Vilaverde foi a encargada de dar a benvida asegurando "hoxe ídesme permitir que sexa da Amil, porque para nós a Rapa xa era importante, porque é unha tradición que esta parroquia conseguiu manter ao longo do tempo, xeración tras xeración, e agora grazas a este filme vaise dar a coñecer polo mundo adiante". Pola súa banda, Xosé Leal incidiu en que "o patrocinio deste filme pretendía precisamente isto, poñer en valor o patrimonio e a lingua galega como elemento vehicular para amosar ao mundo unha realidade local e que, estamos seguros, vai acadar relevancia internacional". Durante o encontro, as persoas asistentes puideron ver un pequeno fragmento do filme correspondente á parte rodada na Amil, así como unha selección de foto fixa na que aparecen as e os aloitadores, coa idea, segundo explicou Xacio Baño, de amosar como a tradición da Rapa das Bestas vai quedar reflectida na montaxe final.

O cinema como viaxe

"No século XXI o cinema é un dos vehículos máis relevantes para transmitir, dar a coñecer e facer viaxar a nosa cultura, porque é moito máis efectivo que a música ou a literatura" asegurou Baño. Como exemplo de como unha cultura local ou singular pode viaxar polo mundo, citou a súa curta Ser e voltar, que tamén se visionou durante a sesión, e que rodara con seus avós na súa aldea. "Este traballo viaxou moi ben por medio mundo, porque o público o que quere é coñecer novas miradas e realidades diferentes" explicou o realizador. Baño utilizou a curta como exemplo por entender que inclúe unha contorna rural na que as persoas presentes se podían sentir identificadas.

Sobre a Rapa das Bestas en particular, afirmou que "as tradicións vanse transformando e moitas veces vanse perdendo porque, cada vez máis, camiñamos cara un ser humano máis uniforme e o papel dos creadores é o de amosar miradas diferentes e non ter medo de difundilas". Xacio Baño tamén fixo unha defensa da cultura de seu indicando que "ás veces fáisenos difícil ver que o noso, o que nos rodea, é relevante, e ten que vir xente de fóra para que nos deamos conta". Neste punto, o realizador insistiu en que "estas imaxes amosan moi ben unha parte da nosa cultura e da nosa idiosincrasia como galegos". Baño asegurou, ademais, que "Rapa foi unha experiencia fantástica, porque ten algo moi cinematográfico, e estou seguro que nos fará viaxar moito e moi ben polos festivais do mundo".

Imaxes espectaculares

Tanto Sergio Frade como Xacio Baño coincidiron en afirmar que "as imaxes da Rapa quedaron espectaculares". O director confesou que "desde fóra a idea de meter as cámaras no curro dábanos moito respecto, porque é un lugar con animais, xente, caos, e non sabiamos como ía resultar". Sen embargo a experiencia non puido saír mellor a ollos do equipo do filme, que mesmo aseguran que "as imaxes da Rapa son absolutamente fundamentais para a película".

Xacio Baño lembrou que "saíu todo o equipo en éxtase do curro, e xa naquel momento sabiamos que alí tiñamos algo máxico, latente, con posibilidades de facer algo grande". O filme arranca precisamente coas e cos aloitadores da Amil, cunha secuencia na que aparecen falando unha semana antes da celebración da Rapa das Bestas.

Pola súa banda, Sergio Frade anunciou que grazas á espectacularidade das imaxes da Rapa xa se interesaron no filme desde os festivais de Toronto, de Cannes e de Venecia.

Trote

O proxecto de Trote narra a historia de ficción de Carmen, unha rapaza que está nun punto vital no que ten que decidir entre a dicotomía de "coidar, atender á familia e ser humana, ou trotar e ser animal". A equipa de rodaxe que en xullo rodara na Amil estivera formada por máis de trinta persoas que despois continuaron a gravación durante catro semanas en diferentes localizacións. Entre o elenco de actores están María Vázquez, que interpreta a Carmen; Celso Bugallo como Ramón (o pai); Diego Anido como Luís (o irmán) e Tamara Canosa como María (a amiga e parella de Luís).

Trote é un proxecto de ficción producido por Frida Films, responsable de títulos como María y los demás, seleccionada a concurso no Festival de San Sebastián 2016, Los Increíbles Sección Novos Directores-Festival de San Sebastián, ou La Mujer del Eternauta na Sección Oficial do Festival de Málaga e o Festival de Sitges, entre outros títulos.

Xacio Baño, director e coguionista da película, presentou o proxecto en setembro de 2015 na Residencia Ikusmira Berriak organizado polo Festival de San Sebastián. Trote foi un dos catro proxectos seleccionados durante esa convocatoria, onde durante un mes e medio recibiu o asesoramento de expertos tan importantes como Paz Lázaro (directora de programación da sección Panorama do Festival de Cine de Berlín) e Marian Slot (produtora de Lars von Trier, Thomas Vintenberg ou Lucrecia Martel). Ademais, lKusmira Berriak garantiu a selección automática do filme no Festival de San Sebastián unha vez rematado o proxecto.


Novas relacionadas

Cine

13 decembro 2017, facultade, ciencias sociais, ciencias sociales, facultad

Outras novas

Cine

13 decembro 2017, facultade, ciencias sociais, ciencias sociales, facultad
Xurado Otero Pedraio

12 decembro 2017, premios, muller, otero pedraio
Presentación do calendario solidario "Sorrisos que contaxian"

12 decembro 2017, calendario, solidario, deleción 1p36