Noticias
Roteiro literario Monte Aloia

A maxia e o mito do Monte Aloia protagonizarán o segundo dos roteiros literarios da provincia

Trátase dunha iniciativa da área provincial de Cultura e Lingua, en colaboración coa AELG, coa que se pretende dar a coñecer o patrimonio inmaterial da provincia a través dunha perspectiva literaria e cultural


12 setembro 2017

Esta mañá presentouse no Concello de Tui o segundo dos roteiros literarios que a Deputación pon en marcha, en colaboración coa AELG, no marco das actividades do Ano do Patrimonio, que terá lugar o vindeiro sábado 16 de setembro co Monte Aloia como eixo central. O percorrido, que leva por título "Monte Aloia. Ruta Aloia máxico, mítico e lendario", estará guiado polo poeta, ensaísta e narrador Vítor Vaqueiro. Na presentación estiveron presentes o deputado de Cultura e Lingua, Xosé Leal, o alcalde de Tui, Enrique Cabaleiro, e a escritora e membro da Asociación de Escritoras e Escritores en Lingua Galega, Marta Dacosta. Tamén estiveron arroupando a iniciativa os concelleiros, José Martínez Tato, Miguel Ángel Capón Rey, e Laureano Alonso Álvarez.

O deputado nacionalista sinalou durante a súa intervención que á hora de deseñar esta iniciativa "se foron elixindo diferentes zonas para dar unha visión sobre o patrimonio inmaterial de especial relevancia de diferentes lugares da provincia". O primeiro dos cinco roteiros planificados tivo lugar o pasado sábado coa Illa da Memoria –a Illa de San Simón– como eixo central, e fora un éxito de público e participación cubrindo todas as prazas. No caso do roteiro do Monte Aloia xa só quedan libres 6 prazas –dun máximo de 50– e a inscrición pódese facer de balde no teléfono do Concello de Tui: 986 603 625

Xosé Leal salientou, no caso do roteiro de Tui, que "a maxia deste monte, a súa compoñente mítica recollida tanto na literatura como na sabedoría popular, será a que centre o percorrido literario". O deputado volveu lembrar que "a través deste tipo de actividades o que buscamos é a colaboración máxima cos concellos para complementar as súas ofertas culturais, e neste Ano do Patrimonio non podiamos deixar de lado o Monte Aloia, do que este sábado poderemos gozar a través dunha visión literaria e paisaxística entendida".

Na singularidade do Monte Aloia tamén incidiu de xeito significativo o alcalde de Tui, Enrique Cabaleiro, ao asegurar que " é un espazo ambiental único, e de feito é o segundo parque natural de Galicia, e neste caso servirá para escenificar algo tan marabilloso como é a literatura". Cabaleiro tamén afirmou que "todo Tui é literatura", e ademais da paraxe elixida tamén quixo aproveitar para poñer en valor o centro histórico da localidade engadindo que "este paseo literario se podería facer en calquera recuncho do centro".

O roteiro

O punto de saída será o lugar de estacionamento situado perante a antena de radio, case no cume do monte. A seguir, comezarase un percorrido que discorrerá pola capela de San Fins e o seu espazo murado adxacente, para baixar na procura da muralla. Visitaranse dous miradoiros, o do enxeñeiro Areses, persoa chave na construción do parque, e o do castelo. Tamén se pasará pola cruz que conmemorou o ano santo de 1900, que permite unha visión magnífica sobre o Baixo Miño, co confronto da Galiza e Portugal e, finalmente, a un elemento fundamental do roteiro, que é a cama de San Xián, para terminar no mesmo punto que o do comezo. A través deste percorrido o guía, o escritor Vítor Vaqueiro, reflectirá as crenzas que se relacionan co culto dos montes, os corpos santos, ou os santos hidróforos, así como os rituais levados a cabo en certos lugares do monte que teñen que ver coa pedra do sol e a pedra da auga. "A obra literaria na que se basea este percorrido é a guía sobre o Aloia máxico do propio Vaqueiro" explicou Marta Dacosta.

A escritora e representante da AELG tamén deu conta do obxectivo xenérico dos paseos literarios cualificándoos como "actividades que nos permiten difundir, dunha maneira distendida e lúdica, o coñecemento sobre a literatura escrita na nosa lingua e, ao mesmo tempo, difundir o coñecemento sobre os propios escritores e escritoras". Dacosta tamén indicou que este tipo de roteiros "amosan o noso patrimonio inmaterial desde o punto de vista literario e cultural, para comprender e amar o noso espazo". E no caso particular do Monte Aloia salientou que "ten un significado patrimonial para os galegos e as galegas extensísimo, que incluso nalgún momento se identifica co mítico Medulio, o que entronca este espazo coa raíz da nosa identidade".

Ao longo do mes de setembro e comezos de outubro terán lugar tres roteiros máis por diversas comarcas da provincia. O seguinte roteiro terá lugar en Cangas o sábado 23 de setembro. Leva por título "Roteiro do patrimonio da cultura mariñeira na literatura de Bernardino Graña", e estará guiado por Héitor Mera. O cuarto dos percorridos, que terá lugar en Cambados o sábado 30, leva por título "Roteiro do Centenario Da terra asoballada". Estará guiado por Ramón Caride Ogando e centrarase na pegada de Cabanillas en lugares significativos de Cambados. E por último, o sábado 7 de outubro, a parroquia estradense de Berres acollerá "Roteiro Avelina Valladares, unha muller do tempo dos Precursores", a cargo do autor Xosé Luna Sanmartín.


Novas relacionadas

Roteiros Literarios

02 setembro 2017, pontevedra, deputación, illa de san simón, roteiro, aelg, roteiros literarios, xosé maría álvarez cáccamo

Outras novas

Roteiro Cangas

21 setembro 2017, cangas, xose leal, roteiros literarios
TEK-FEST 2017

20 setembro 2017, museo de pontevedra, música, universidade de vigo, deputación de pontevedra, folclore, concello de pontevedra, tek-fest
Viveiro de empresas

20 setembro 2017, lalín, carmela silva, rafael cuiña, deza, viveiro, deputación de pontevedra, concello de lalín
Workshop AECLab

20 setembro 2017, madrid, uxío benítez, deputación de pontevedra, aeclab, workshop, asociación española de la carretera