Noticias
Reunión

A Deputación implica aos colexios de arquitectos e enxeñeiros galegos e portugueses no deseño da nova ponte peonil sobre o Miño

O deputado de Cooperación Transfronteiriza Uxío Benítez convidou hoxe aos organismos colexiais a que sexan parte do xurado do concurso de ideas para o viaduto


12 setembro 2017

A Deputación de Pontevedra acaba de implicar aos colexios e ordes de arquitectos e enxeñeiros galegos e portugueses no deseño da nova ponte peonil sobre o río Miño. O deputado de Cooperación Transfronteiriza Uxío Benítez reuniuse hoxe cos decanos e presidentes destes organismos e convidounos a participar no xurado do concurso de ideas que seleccionará a imaxe do viaduto que unirá o espazo da Fortaleza en Tomiño co espazo do Castelinho en Vila Nova de Cerveira para "crear o primeiro parque transfronteirizo ibérico".

Benítez explicou que o proxecto para a nova ponte peonil sobre o río Miño é unha actuación incluída na proposta de Preservación e valorización do Río Miño Transfronteirizo ‘Visit Rio Minho' presentada á primeira convocatoria dos fondos europeos do Interreg VA-POCTEP, cun orzamento de dous millóns de euros e que obtivo un 75 % do financiamento (1.500.000 euros) por parte do FEDER, que valorou positivamente a iniciativa.

O nacionalista subliñou que a Deputación considerou que o procedemento máis axeitado para escoller o deseño final para o novo viaduto, dada a súa importancia estratéxica e simbolismo, era a realización dun concurso de ideas, que "é relevante e áxil, ten un carácter público e aberto, potencia a singularidade do proxecto, e permite a intervención dun xurado". De feito, o organismo provincial xa puxo en marcha o concurso para a ponte, que ten o prazo de presentación aberto ata o 23 de outubro.

O procedemento para a selección da proposta gañadora pasará por tres fases: na primeira seleccionaranse as tres mellores ideas, que terán unha prima de participación de 10.890 euros cada unha; na segunda concursarase para desenvolver esas tres propostas finalistas e o gañador ou gañadora redactará o anteproxecto; na terceira fase analizarase a viabilidade da proposta (permisos, autorizacións e licenzas) e redactarase o proxecto construtivo.

No encontro estiveron presentes a alcaldesa de Tomiño, e o vicepresidente da Cámara de Vila Nova de Cerveira, xunto ao arquitecto municipal e outro técnico; o decano do Colexio de Arquitectos de Galicia, Antonio Maroño; o decano do Colexio de Enxeñeiros, Ricardo Babío; o presidente do consello directivo da Ordem dos Engenheiros de Portugal Región Norte, Joaquim Poças; e o vicepresidente da Ordem dos Arquitectos de Portugal, Daniel Fortuna, entre outros.

As persoas representantes destas organizacións colexiais manifestaron a súa satisfacción por que a Deputación tivera elixido a fórmula do concurso de ideas, e non prime unicamente a contía económica do proxecto final, senón tamén a súa adecuación funcional, singularidade, calidade e integración. De feito, fixeron fincapé na necesidade de potenciar propostas tanto de xente moza como de estudios e empresas de calidade.

En canto á participación no xurado do concurso de ideas (que se formará nas vindeiras semanas), os organismos comprometéronse a designar un ou unha voceira, que se sumará aos técnicos e técnicas nomeadas polo Concello de Tomiño, a Cámara de Cerveira, a Deputación e a CIM Alto Minho. Tamén se está a estudiar a participación de persoal funcionario de administracións que teñan que realizar informes vinculantes para a viabilidade do proxecto final (como a Dirección Xeral de Patrimonio).

"A creación do Europarque de Tomiño-Cerveira é unha vella aspiración. A finalidade desta actuación que promove a Deputación non é a construción dunha ponte en si, senón a creación dun grande espazo transfronteirizo para o que a ponte é un medio. A ambos lados do río hai espazos moi diferentes e complementarios e queremos crear un espazo único común que sexa un foco de atracción de turistas", subliñou Benítez para concluír a reunión. 

Fotos


Outras novas

Firma convenio

19 setembro 2017, carmela silva, igualdade, convenio, salustiano mato, universidade de vigo
Alcaldesa de Mos con Uxío Benitez

19 setembro 2017, carretera, estrada, mos, mellora, mejora
Luis Davila

18 setembro 2017, exposición, ponte caldelas, a retranca dun país, luis dávila
Novos Valores

18 setembro 2017, museo, exposiciones, exposicións, mostras, muestras
cursos de español para persoas inmigrantes

18 setembro 2017, carmela silva, xuventude, cohesión social, vigo, deputación de pontevedra, inmigrantes, cursos de español