Cooperación transfronteiriza

Ponte peonil sobre o Miño

A Deputación de Pontevedra aspira a "borrar a fronteira do Miño" co impulso á nova ponte peonil entre Tomiño e Vila Nova de Cerveira. Con este obxectivo, en xullo de 2016, asinouse un protocolo de colaboración para poñer en marcha un concurso internacional de ideas co que se buscarán diferentes opcións para a construción da nova pasarela de conexión entre o Espazo-Fortaleza de Tomiño e o Parque do Castelinho, en Cerveira. A intención é que a nova ponte, a primeira peonil e a sexta entre as beiras portuguesa e pontevedresa, permita unir as áreas recreativas dos dous países, creando un parque transfronteirizo de xestión común, cunha superficie de 100.000 metros cadrados, ademais de facilitar a conexión das veciñas e veciños de Tomiño á estación de tren en Cerveira.