Noticias

Novas relacionadas

Estrada provincial Barro

As obras de mellora da estrada provincial EP-0505 en Barro comezarán na primavera de 2018

Deputación e Concello asinaron hoxe o convenio para executar a actuación, que ascende a 327.565 euros


17 outubro 2017

A Deputación de Pontevedra e o Concello de Barro ratificaron hoxe o convenio de colaboración para a mellora da estrada provincial EP-0505 no Concello de Barro. A presidenta da Deputación Carmela Silva, acompañada do deputado de Mobilidade Uxío Benítez, asinaron o acordo co alcalde de Barro Jose Manuel Fernández Abraldes, mediante o que se executará a actuación. Esta suporá un investimento de 327.565 euros a repartir entre o 70% aportado pola institución provincial e o 30% polo Concello.  As obras permitirán renovar de xeito integral a capa de rodadura, crear un espazo de mobilidade segura para o tránsito peonil e ciclista, así como a instalación de novo saneamento e elementos de calmado de tráfico.

O deputado de Mobilidade Uxío Benítez destacou que a mellora da EP-0505 foi unha das primeiras demandas do alcalde de Barro á nova Deputación, xa que a estrada fora obxecto de sucesivas actuacións incompletas por parte do anterior goberno provincial que xeraron malestar entre a veciñanza: "Era precisa unha actuación definitiva que ademais dotase de servicios á zona". O nacionalista subliñou que estudadas as posibles solucións chegouse á conclusión de facer un proxecto integral de urbanización e mellora de abastecemento, con pasos de peóns sobreelevados (catro), nova sinalización horizontal e vertical e a creación dun espazo de tránsito peonil e de bicicletas.

Benítez destacou que o orzamento das obras ascende a 327.565,38 euros e que a contratación se iniciará de xeito inminente tan pronto como chegue a autorización de Patrimonio –pola proximidade da igrexa de Perdecanai-. Os traballos (que teñen un prazo de execución de seis meses) poderán iniciarse na primavera de 2018 e unha vez rematados a estrada será transferida ao concello de Barro.  

Pola súa banda, o alcalde de Barro Xosé Manuel Abraldes explicou que o ámbito de actuación das obras será 1,2 quilómetros dende a N-550. "Nesta estrada transita moita xente andando, non tantos vehículos, polo que era fundamental unha reserva de espazo para o tráfico peonil e de bicicletas. Agradezo que se recollera a nosa proposta e que se dea rematado a actuación", dixo.

Así mesmo, Abraldes lembrou que hai máis de dez anos que a estrada está permanentemente en obras con pequenas actuacións, sobre todo en épocas preelectorais. "Entendemos que unha obra dun quilómetro haina que facer cun proxecto e executala. Aos veciños resultábanlles moi estrañas tantas fases, polo que saber que no 2018 estará todo executado para nós é fundamental, sobre todo porque terá servizos dos que carece boa parte do noso concello", subliñou.

Finalmente, a presidenta Carmela Silva manifestou a súa satisfacción por ter chegado a un acordo co concello de Barro e destacou que "as institucións estamos obrigadas a elaborar proxectos e levar a cabo actuacións e obras para que veciñas e veciños poidan dispor de todos os servizos aos que teñen dereito".

Silva manifestou que o novo goberno da Deputación "caracterízase polo respecto total á autonomía local dos municipios, pois son os alcaldes e alcaldesas as que verdadeiramente saben o que necesitan e queren os seus veciños e veciñas. Nós non tomamos decisións arbitrarias e unilaterais de accións nos concellos. Nós temos un modelo de actuación nas infraestruturas provinciais que se basea en mellorar a mobilidade, a accesibilidade e a seguridade para todos e todas as veciñas".

"Quero dicir publicamente que o alcalde de Barro, co seu traballo, dignifica cada día aos políticos", destacou, para engadir que "as obras non deben estar pensadas para rematalas xusto antes dunha cita electoral porque iso racha totalmente co modelo das que creemos que todos e todas as veciñas teñen dereitos".


Outras novas

Estrada provincial Barro

17 outubro 2017, carmela silva, uxío benítez, mobilidade, barro, deputación de pontevedra, ep-0505
Plan Concellos 2017

15 octubre 2017, plan concellos 2017, vilagarcia de arousa