Noticias
Master Class de cociña

O Concello ofrece unha "master class" de elaboración de pinchos aos cociñeiros do Caldelas Tapas

O chef ourensán Miguel González animou a utilizar novas técnicas e deu consellos prácticos para a organización e o empratado rápido


15 xuño 2017
Ponte Caldelas

Os profesionais da cociña que participarán na terceira edición do concurso Caldelas Tapas, que se celebrará durante as noites de venres do mes de xullo, participaron onte nunha clase maxistral en elaboración de pinchos, organizada polo Concello de Ponte Caldelas co obxectivo de contribuír a orixinalidade e calidade das elaboracións.

A master class estivo a cargo do chef ourensán Miguel González Quintela, que conta cun currículo no que destaca o seu paso polos restaurantes Akelarre, de Pedro Subijana, e Zarautz de Karlos Arguiñano. Unha carreira na que tamén cociñou no Xaques Maximin, de Niza, á parte de outros galegos como o Praia Club, de A Coruña; o Pazo Mendoza, de Baiona; A Rexidora, de Bentraces; o San Miguel, de Ourense ou o Sete Torres, de Vigo. Foi gañador do concurso de pinchos de Ourense.

O alcalde, Andrés Díaz, asistiu ao comezo da sesión e aproveitou a ocasión para saudar e desexar sorte aos cociñeiros e cociñeiras participantes neste curso intensivo. En nome de todo o grupo de goberno, formado polo PSdeG-PSOE, AVP e BNG, destacou o apoio constante á hostalería local e o desexo do Concello de contribuír ao desenvolvemento de todo o potencial deste subsector.

Ademais destacou o pulo do Caldelas Tapas, que o ano pasado serviu 6.000 racións, unha cifra realmente importante. Un certame en crecemento, pois este ano xa confirmaron a súa vontade de participar 16 establecementos, tres máis que o ano pasado. Un dato que tamén ten que ver co crecemento que está a experimentar a hostalería, coa apertura de novos locais durante o último ano.

Durante a master class, ofrecida nos locais do Forga no polígono de A Reigosa, Miguel González elaborou as súas tapas "O atún e a primavera" e "Vieira en costra de millo sobre cogomelos e castañas, iogur líquido picante e folla de figueira crocante". Ao tempo deu consellos para acadar sabores, texturas, temperaturas e todo tipo de contrastes no prato.


Outras novas

Estrada provincial Barro

17 outubro 2017, carmela silva, uxío benítez, mobilidade, barro, deputación de pontevedra, ep-0505
Plan Concellos 2017

15 octubre 2017, plan concellos 2017, vilagarcia de arousa