Noticias
Xuntanza Folk Follas do Olivar

A terceira Xuntanza Folk Follas do Olivar convoca este sábado aos afeccionados á música popular

O certame inclúe tamén programación de lecer, con xogos tradicionais, actuacións e diferentes postos de comida


05 xuño 2017

A Carreira Ancha da parroquia de A Insua acolle este próximo sábado, día 10, a terceira edición da Xuntanza Folk Follas de Olivar, baixo o impulso da asociación cultural Nós tamén imos. Un certame que xa o ano pasado concitou a asistencia dun milleiro de persoas ao longo de todo o día.

O alcalde, Andrés Díaz, e o tenente de alcalde, Lito Muíños, recibiron hoxe a Julio César Darriba e Emilio Baqueiro, directivos da asociación, cos que pecharon os detalles dunha xornada coa que o Concello colabora participando no acondicionamento do recinto, a achega que a asociación recibe a través do Plan Cultural, a instalación dun xerador de electricidade e a edición e impresión do cartaz.

Os promotores explicaron que a experiencia deste festival comezou cando decidiron transformar o antigo Serán nun festival folclórico. A primeira edición estivo chea de dificultades e, ademais, o tempo non acompañou, pero xa o ano pasado comezaron a recoller os froitos, pois asistiron case todos os veciños, ademais  de visitantes chegados de concellos próximos, e mesmo de puntos afastados de Galicia onde se celebran festivais irmáns.

O programa da Xuntanza Folk comeza ás 12 da mañá e continuará ata as 4 da madrugada aproximadamente. Actuarán os grupos Nós tamén imos, Calcetín Furado, Sobre Rodas (dúo de zanfoñas de O Viso), o pallaso Peter Punk (de Cangas), Trouleada, Os Xeitosos (de A Insua), Carapaus (de Santiago) e Ardentía (de Vigo). Os asistentes tamén poden repoñer forzas nos postos de polbo, churrasco, empanada, pementos de Padrón e tortillas.

O festival está así dirixido non só aos amantes da música tradicional galega, senón a todas as persoas que queiran pasar un rato agradable e de convivencia, gozar dunha comida ao aire libre e participar do bo ambiente que sempre se respira na Carreira Ancha.

O alcalde, Andrés Díaz, subliñou o orgullo que para o Goberno local, composto polos grupos municipais do PSdeG-PSOE, AVP e BNG, supón a organización deste  tipo de actos, que xorden da inquedanza dos veciños. Ao mesmo tempo subliñou o pulo que a música tradicional galega  ten en Ponte Caldelas, terra de gaiteiros e pandereteiras. Unha forza que se expresa moi claramente con citas como esta Xuntanza Folclórica, ou os Seráns de Regodobargo e Chaín, que están  a experimentar un forte  crecemento.

Julio César e Emilio explicaron que é unha gran satisfacción poder sacar adiante un evento destas características, a medio camiño entre un certame musical e unha romaría popular. A principal dificultade, insistiron, é a económica, pois cómpre correr con moitos gastos. A aventura só é posible grazas aos patrocinadores e á colaboración da xente. Este ano contan con Supermercados Dia, Cybor Vídeo, Aluminios Rodríguez, Cervexaría Alameda, Asimec, a asociación de veciños de A Insua, o Concello de Ponte Caldelas e maila Deputación Provincial.


Outras novas

DELE

22 agosto 2017, xuventude, cohesión social, cursos, deputación de pontevedra, dele, cursos español, cursos intensivos de español
En ruta coa depo

22 agosto 2017, andainas, caminata, excursiones, excursións
Administración electrónica

21 agosto 2017, administración electrónica, implantación
conectadas 2017

20 agosto 2017, pontevedra, mondariz, a estrada, igualdade, vigo, conectadas, conectadas 2017, muller cultura, muller emprende