Noticias
Trinta

Xubilación de Jesús Garrido, tras máis de 40 anos traballando nun taxi en Ponte Caldelas

"O Trinta" foi homenaxeado cun xantar ao que asistiron os seus amigos e o alcalde


09 xuño 2017
Ponte Caldelas

Un dos personaxes máis coñecidos de Ponte Caldelas viviu hoxe unha xornada moi emotiva. Os amigos de Jesús Garrido Garrido organizáronlle unha homenaxe con motivo da súa xubilación, tras cumprir máis de 40 anos ao volante dun taxi.

Na homenaxe participou tamén o alcalde, Andrés Díaz Sobral, quen subliñou o carácter agradable e sempre ao servizo dos veciños de Suso, a quen todo o mundo coñece como "O Trinta", un alcume herdado do seu pai, orixinario de Barbudo e emigrante durante case toda a súa vida en Lisboa. "Hai xente que pensa que vén do número do meu taxi, pero é o 8, simplemente é un nome que lle puxeron a meu pai non sei por que, pero tamén hai outros aos que chaman "O Trinta", sen ir máis lonxe en Moscoso ou en Arcade".

O grupo posou diante da parada de taxis antes de celebrar unha comida no restaurante Pipeiro onde repasaron as anécdotas de toda unha carreira profesional na que deu boa conta de oito coches distintos. Colleulle a praza de taxi hai 40 anos a un veciño de Gradín, chamado Juan Carlos e déixaa agora a outro rapaz de Taboadelo, curiosamente, co mesmo nome.

"O Trinta" emigrou coa súa familia á capital de Portugal con só 9 anos e non volveu a Ponte Caldelas ata os 28, despois de tramitar un permiso para  atrasar a súa incorporación ao servizo militar. Daquela, dada as súas circunstancias, tiña que facer moito papeleo no Consulado e non podía voltar a España máis de dous meses ao ano, conta.

Comezou a conducir o taxi o 8 de maio de 1977, un oficio ao que chegou de casualidade, pois o seu pai rexentaba un negocio de viños e petiscos en Lisboa e nada tiña que ver co sector. Atopou así un medio para gañarse a vida "a base de botarlle moitas horas, porque este é un traballo moi escravo se queres sacarte un soldiño para vivir".

Lembra que naqueles anos había dúas paradas de taxi e 11 licencias en Ponte Caldelas e agora só queda a da Alameda con 8. Aínda hai traballo, subliña, sobre todo grazas á xente maior que precisa dos servizos do taxi para facer desprazamentos que en moitas ocasións son a Montecelo, á Casa do Mar de Pontevedra ou mesmo ao Centro de Saúde de Ponte Caldelas.

Os tempos cambiaron moito, destaca, e tira de memoria para  lembrar que hai anos unha viaxe a Pontevedra custaba 400 pesetas e agora oscila entre 17 e 18 euros, segundo sexa o destino. Sen embargo, a maior parte dos servizos son entre parroquias caldeláns e o centro.

"O Trinta" valora o pulo que está a notar ultimamente en Ponte Caldelas, pero lamenta que ten perdido moito "e hoxe hai moitas casas que ata hai ben pouco eran de familias ben coñecidas e hoxe están pechadas e abandonadas".


Outras novas