Noticias
Primeiro venres de Caldelas Tapas

O Caldelas Tapas arranca con forza con máis de 2.000 unidades vendidas nun só día

Boa parte dos 16 locais participantes quedaron sen existencias antes das 11 da noite e algúns alcanzaron a cifra de 300 tapas


01 xullo 2017

A terceira edición do concurso gastronómico Caldelas Tapas arrancou con maior forza que nunca. O certame, que se celebra nas noites de venres do mes de xullo, estreouse cunha cifra récord de máis de 2.000 tapas vendidas nunha soa xornada.

Ao Caldelas Tapas sumáronse este ano 16 locais de hostalería e, como é habitual, a maior animación nesta primeira noite rexistrouse no ámbito urbano, aínda que xa comezaron a chegar comentarios sobre as bondades das tapas que se están a servir nalgúns dos establecementos menos céntricos.

O cartel do concurso serve de guía e roteiro a unha clientela que, nos próximos venres, irá degustando as especialidades que ofrece cada local. De manterse este ritmo todo indica que se superarán moi folgadamente as máis de 5.000 tapas consumidas na segunda edición do Caldelas Tapas.

Entre o público asistente estivo o alcalde, Andrés Díaz, e tamén algúns concelleiros do Goberno local tripartito (PSdeG-PSOE, AVP e BNG). Todos valoraron a calidade desta proposta gastronómica que supón un potente motor de dinamización económica  para a hostalería local ao longo de todo o mes de xullo.

Durante a xornada de onte, chegaron a servirse ata 300 tapas nos locais con maior movemento, mentres que os rexistros máis modestos non baixaron das 75 tapas, unhas cifras máis que aceptables e acollidas con satisfacción polos participantes.

O Caldelas Tapas descansará o próximo venres, por mor da coincidencia coa II Festa Gastronómica da Emigración, na que a Alameda acollerá 12 establecementos de restauración que ofrecerán pratos típicos relacionados cos países da diáspora galega. Unha proposta novidosa, impulsada dende o Concello, e que o ano pasado estreouse cuns resultados que superaron amplamente as expectativas.

Fotos


Outras novas

Rutas etnoarqueolóxicas do Ano do Patrimonio

23 agosto 2017, cultura, oia, ano do patrimonio, etnoexperiencias
premios provinciais xuventude

23 agosto 2017, pontevedra, deputación de pontevedra, premios provinciais á xuventude, premios xuventude, último trimestre
DELE

22 agosto 2017, xuventude, cohesión social, cursos, deputación de pontevedra, dele, cursos español, cursos intensivos de español
En ruta coa depo

22 agosto 2017, andainas, caminata, excursiones, excursións