Noticias
Festa en Ponte Caldelas

A Festa Gastronómica da Emigración de Ponte Caldelas serviu 15.000 pratos, un 138% máis que o ano pasado

O Goberno local anuncia a elaboración dunhas bases para o ano próximo co obxectivo de apostar pola calidade e a mellora continua


10 xullo 2017

A II Festa Gastronómica da Emigración de Ponte Caldelas pechou as súas portas onte, domingo, cun crecemento que superou nun 138% á estrea do pasado ano. Ao longo da fin de semana servíronse uns 15.000 pratos, deixando moi cativa a cifra dos 6.300 da primeira edición. A satisfacción entre os hostaleiros e o público participantes foi total.

Unha enquisa realizada entre os titulares dos 12 postos de comida representativa dos países e lugares relacionados coa emigración caldelán saldouse cunha nota media dun 9,5 sobre 10, toda vez que a nota mínima outorgada foi un 9. Todos os expositores subliñaron que experimentaron un crecemento espectacular sobre o ano pasado, oscilando entre o dobre e o triplo, segundo os casos. Ao tempo, os que se incorporaron este ano amosáronse abraiados pola acollida.

O retoque das datas, iniciando a Festa no venres noite e rematando co xantar do domingo foi valorado como un acerto que explica parte do crecemento. Varios locais recoñeceron que a estrea do venres foi espectacular e obrigou a reforzar as provisións para non quedar sen existencias. O sábado houbo cheo total, especialmente durante a cea, cando se chegaron a rexistrar esperas de case media hora para conseguir os pratos dalgúns dos stands máis concorridos. A animación musical con música galega, batucada brasileira e mariachis mexicanos volveu constituír outro dos atractivos máis valorados.

O Goberno local instalou 1.200 cadeiras, ocupando a totalidade do espazo dispoñible na Alameda e a previsión, que supuña un crecemento substancial sobre as 800 instaladas sobre o ano anterior, resultou acertada.

Na Festa Gastronómica da Emigración ofrecéronse pratos de comida internacional a 5 euros con bebida incluída. A maiores  cada local tivo liberdade para preparar outras presentacións, sempre representativas do mesmo país ou comunidade autónoma. Así, o cartel estivo formado polo Mesón Porteliña (Poio), coa gastronomía de Brasil; o restaurante Alalá (Venezuela), Verdugolandia (Uruguay), Klimbin (Portugal e Brasil), O Recanto (Estados Unidos) e o Mesón Mexicano de Tourón (México). Paralelamente, a Asociación Cultural de Chaín elaborou uns callos madrileños, a asociación Aires del Norte y Olé dedicouse ao corte de xamón con pan e viño e unha polbería ofreceu o típico polbo á feira galego. As dúas panadarías locais (Pecas e O Pan de San Antonio) ofertaron todo tipo de postres e empanadas. O elenco completouse co posto solidario que presentou unha paella valenciana co obxectivo de doar os ingresos a proxectos e programas destinados aos inmigrantes e a Cáritas Venezuela.

O Goberno local caldelán formado por PSdeG-PSOE, AVP e BNG está moi satisfeito destes resultados, que sitúan á Festa Gastronómica da Emigración como un dos eventos deste tipo con maior tirón popular de Galicia. Aínda que é difícil calcular o volume total de visitantes atraídos durante a fin de semana estímase que estivo moi por enriba das 20.000 persoas, toda vez que os bares e restaurantes do municipio rexistraron unha gran actividade.

O alcalde, Andrés Díaz, recorreu persoalmente todos os stands recollendo suxestións para a terceira edición. O rexedor anuncioulles que o Concello elaborará unhas bases que rexerán o certame, nas que quedarán establecidas todas as condicións e requisitos. "Creo que temos crecido dun xeito vertixinoso, ata o punto que xa non podemos pensar en aumentar moito máis no futuro; a aposta agora ten que ser pola calidade, consolidando o moito bo que temos e mellorando nas pequenas cousas que cómpre corrixir".

O alcalde adianta que haberá novas incorporacións de restaurantes que xa este ano estaban moi interesados, pero os establecementos participantes nesta  segunda edición, todos eles locais agás un, teñen o posto asegurado, "porque fixeron un traballo espléndido e son copartícipes do éxito".

O Concello agradece o esforzo, pois foron tres días de moita esixencia física, nos que hai constancia de que, diante da demanda, algunhas cociñas e fornos traballaron en horario nocturno para ter a punto as elaboracións.

Fotos


Outras novas

Rutas etnoarqueolóxicas do Ano do Patrimonio

23 agosto 2017, cultura, oia, ano do patrimonio, etnoexperiencias
premios provinciais xuventude

23 agosto 2017, pontevedra, deputación de pontevedra, premios provinciais á xuventude, premios xuventude, último trimestre
DELE

22 agosto 2017, xuventude, cohesión social, cursos, deputación de pontevedra, dele, cursos español, cursos intensivos de español
En ruta coa depo

22 agosto 2017, andainas, caminata, excursiones, excursións