Noticias
BTT Troita

A cuarta edición da BTT Troita congregará a máis de 300 ciclistas, demostrando a fortaleza desta proba

A cita caldelán mantén o tirón, a pesar da forte competencia no calendario


30 maio 2017

A cuarta edición da ruta de ciclismo todo terreo de Ponte Caldelas, BTT Troita, congregará a máis de 300 participantes. A proba, que se celebra o próximo 4 de xuño, está a pechar estes días o período de inscrición con todos os detalles da organización case pechados.

O alcalde, Andrés Díaz, e o responsable da empresa Global DxT, Josevi Cimadevila, analizaron os preparativos dunha proba que é xa un clásico no panorama do "mountain bike" galego. Ambas partes repasaron a posta a punto dun percorrido de 38 Km que transcorre, en gran parte, por paisaxes de gran beleza natural.

O Goberno local caldelán, formado por PSdeG-PSOE, AVP e BNG, aposta polo reforzamento desta proba, así como da carreira pedestre de Ponte Caldelas. Non obstante, é consciente de que é necesario ir introducindo cambios para dotalas do suficiente atractivo para manter a súa capacidade de convocatoria. Dende o club organizador constatouse que nestes últimos anos están a desaparecer algunhas carreiras de nova creación, toda vez que as cifras de inscrición evidencian unha tendencia global á baixa.

A BTT Troita, ao superar os 300 participantes, sitúase entre as máis concorridas de Galicia, por enriba doutras celebradas en cidades ou municipios de moita maior poboación. E iso, a pesar de que a filosofía desta convocatoria, que aposta por unha dificultade media e un percorrido de "só" 38 Km contrasta cunha certa tendencia a maratóns que se achegan aos 100 Km e máxima dificultade. A aposta é tamén por un prezo de inscrición contido, pois cóbranse entre 10 e 12 euros, segundo o momento de formalización.

O principal atractivo da proba caldelán está na paisaxe e na variedade dun circuíto no que abundan os montes, fragas e beiras fluviais, con subidas, baixadas e trazas moi zigzagueantes, con todos os niveis de esixencia técnica repartidos por tramos.

A Alameda de Ponte Caldelas será, doutra volta máis, o escenario que acollerá aos participantes. Alí congregaranse os habituais servizos que se ofrecen nesta proba, como avituallamentos sólidos e líquidos, lavado de bicicletas e servizo de masaxe, fotografías do evento, agasallos para todos os participantes e moitas sorpresas. A organización tamén proporciona amplas facilidades de aparcamento nos espazos de Chan da Barcia e o paseo da Calzada.


Outras novas

DELE

22 agosto 2017, xuventude, cohesión social, cursos, deputación de pontevedra, dele, cursos español, cursos intensivos de español
En ruta coa depo

22 agosto 2017, andainas, caminata, excursiones, excursións
Administración electrónica

21 agosto 2017, administración electrónica, implantación
conectadas 2017

20 agosto 2017, pontevedra, mondariz, a estrada, igualdade, vigo, conectadas, conectadas 2017, muller cultura, muller emprende