Noticias
Orbe súmase ao Concello de Ponte Caldelas como patrocinador da SCD Ponte Caldelas

Orbe súmase ao Concello de Ponte Caldelas como patrocinador da SCD Ponte Caldelas

A empresa participa na entrega de premios do torneo de fútbol base da Festa da Troita


28 maio 2017
Ponte Caldelas

As alianzas entre o Concello de Ponte Caldelas e o grupo Orbe continúan estreitándose. A conserveira, radicada no polígono de A Reigosa dende hai un ano, converteuse en patrocinador da Sociedade Cultural e Deportiva Ponte Caldelas, polo que a súa imaxe corporativa aparecerá na parte inferior do reverso das camisetas do equipo verde.

O acordo, polo que se achegan 3.000 euros para a próxima temporada, foi ratificado polo director xerente do grupo Orbesa, Juan José Vicente, e o presidente da SCD Ponte Caldelas, Pedro César Rodríguez. Asistiu o alcalde, Andrés Díaz, como impulsor deste patrocinio, no marco das estreitas relacións que o Concello mantén coas principais empresas do municipio.

Os tres participaron na entrega de trofeos do Torneo de Fútbol Base da Festa da Troita, celebrado onte no campo de Chan da Barcia. Ademais dos diferentes equipos do club verde competiron, como invitados, o Vila de Marín, o Alondras, o Cambados e o Pontevedra C.F.

Pedro Rodríguez cualificou este acordo como "unha axuda moi importante" e destacou que a imaxe de Orbe viaxará agora por todos e cada un dos campos da provincia nos que xoga a SCD Ponte Caldelas, cuxo primeiro equipo vén de ascender a Primeira Rexional.

Dende Orbe subliñouse a súa aposta polo deporte base e tamén por especialidades minoritarias como o remo ou a vela, onde tamén manteñen un activo mecenazgo.

Orbesa, unha das grandes  referencias do sector conserveiro galego, está implantada en Ponte Caldelas dende o 18 de abril de 2016, data na que inaugurou unhas espectaculares instalacións, nas que investiu 10 millóns de euros. Na actualidade proporciona 140 postos de traballo, dando sempre prioridade aos veciños e veciñas de Ponte Caldelas.

O Concello e Orbesa manteñen unha colaboración moi beneficiosa para ambas partes, pois a empresa obtivo unha rebaixa na súa fiscalidade a cambio de utilizar a bolsa de emprego municipal, na que están anotados boa parte dos veciños en situación de desemprego.


Outras novas